Wer kännt’s ned, das luschtige Lied vo de Stubete Gäng «de Richi, de Richi»

Eifach unterhaltsam und witzig, so richtig zum fäschte, genau passend zu eusem Richi.

Luschtig, herzlich, unternähmigsluschtig, ufgstellt, raschtlos, ideeriich, fantasiriich, immer en Witz uf Lager, eifach e gmüetsmore, wommer unglaublich fescht i euses Herz gschlosse händ.

Richi, mer vermissed Dich.

Bisch Du doch fürs Wisse Chrüz näbsch de Margrith, de Fels i de Brandig gsi.

Guet chömmer Eus erinnere, wimmer im Wisse Chrüz als Stammbeiz gstarted händ. Am Afang nochli mit Abstand und schnell isch denn aber klar gsi, dass es eifach uhure guet zäme passt, s’Wisse Chrüz und s’WTC. Zäme hets e ganz e schöni Fründschaft gäh.

No immer, isch es au für eus so unreal, dass du plötzlich nümme do bisch. Keis Winke me vo dir, wämmer mit eusne Töff vom Wisse Chrüz weg fahre werdet.

Euses Harley Brumme, genau wo d’Urne Bisetzig gsi isch, sell dich in Himmel begleitet ha.

Und ja Du wirsch immer obe abe güggsle mit eme fräche Spruch, emene luschtige Witz oder ä herzliche Umarmig.

Danke Richi, dass mer Dich händ dörfe känne und schätze lehre.

Text: Mary